3 красавіка 2017 г. адбылося ўрачыстае адкрыццё выставы
«Дакументальная спадчына Беларусі XVI–XIX стагоддзяў: архіў Слуцкага
Свята-Троіцкага манастыра», падрыхтаванай па выніках сумеснага праекта
Нацыянальнага гістарычнага архіва Беларусі і Нацыянальнага гістарычнага
музея Рэспублікі Беларусь.
Мэтай праекта з’яўлялася атрыбуцыя, апісанне і стварэнне лічбавых
копій рукапісных дакументаў XVI–XIX стагоддзяў з фондаў музея,
прадастаўленне магчымасці азнаёміцца з імі шырокаму колу даследчыкаў,
што з’яўляецца асабліва актуальным у бягучым годзе, абвешчаным у
Рэспубліцы Беларусь Годам навукі.
Архівістамі была праведзена апрацоўка і алічбоўка комплекса
дакументаў Слуцкага Свята-Троіцкага манастыра. Свята-Троіцкі манастыр у
Слуцку з’яўляўся рэзідэнцыяй слуцкіх архімандрытаў і адным з
найбуйнейшых цэнтраў праваслаўнай царквы ў Вялікім Княстве Літоўскім. У
сувязі з гэтым у яго архіве захавалася мноства дакументаў, складзеных не
толькі на тэрыторыі Слуцка і Слуцкага княства, але і ў Вільні, Кіеве,
Заблудаве, многіх іншых гарадах і мястэчках Навагрудскага, Мазырскага,
Пінскага, Лідскага і Гродзенскага паветаў.
На выставе прадстаўлена некалькі дзясяткаў найбольш цікавых
дакументаў, у тым ліку аўтографы караля Аўгуста ІІ, князёў Крыштофа,
Януша і Багуслава Радзівілаў, рэйнскага пфальцграфа Карла-Філіпа
Нойбурга.
Падчас адкрыцця выставы перад прысутнымі выступілі старшыня
камісіі Палаты прадстаўнікоў па адукацыі, культуры і навуцы
І.А.Марзалюк, дырэктар Нацыянальнага гістарычнага музея Рэспублікі
Беларусь А.Г.Рыжкоў, дырэктар НГА Беларусі Д.У.Яцэвіч, дырэктар
Інстытута гісторыі НАН Беларусі В.В.Даніловіч, а таксама намеснік
дырэктара НГА Беларусі Д.В.Лісейчыкаў.
У ходзе мерапрыемства адбылася ўрачыстая перадача музею
вырабленых архівам лічбавых копій дакументаў.
У адкрыцці выставы таксама прынялі ўдзел прадстаўнікі Дэпартамента
па архівах і справаводству Міністэрства юстыцыі Рэспублікі Беларусь,
Міністэрства культуры Рэспублікі Беларусь, Беларускай Праваслаўнай
Царквы, прадстаўнікі навуковай грамадскасці, студэнты вышэйшых
навучальных устаноў.
Выстава працуе да 9 красавіка 2017 г. у памяшканні Нацыянальнага
гістарычнага музея Рэспублікі Беларусь (г. Мінск, вул. Карла Маркса, 12).
![Фото](/images/dak-spadchina/001.jpg)
Банер сумеснай выставы, размешчаны на будынку Нацыянальнага
гістарычнага музея Рэспублікі Беларусь
![Фото](/images/dak-spadchina/002.jpg)
Старшыня камісіі Палаты прадстаўнікоў па адукацыі, культуры і
навуцы І.А.Марзалюк
![Фото](/images/dak-spadchina/003.jpg)
Дырэктар НГА Беларусі Д.У.Яцэвіч
![Фото](/images/dak-spadchina/004.jpg)
Дырэктар НГА Беларусі Д.У.Яцэвіч перадае лічбавыя копіі
дакументаў дырэктару Нацыянальнага гістарычнага музея Рэспублікі
Беларусь А.Г.Рыжкову
![Фото](/images/dak-spadchina/005.jpg)
Дырэктар Інстытута гісторыі НАН Беларусі В.В.Даніловіч
![Фото](/images/dak-spadchina/006.jpg)
Намеснік дырэктара НГА Беларусі Д.В.Лісейчыкаў
![Фото](/images/dak-spadchina/007.jpg)
У часе адкрыцця выставы
![Фото](/images/dak-spadchina/008.jpg)
У часе адкрыцця выставы
![Фото](/images/dak-spadchina/009.jpg)
Фрагмент экспазіцыі
![Фото](/images/dak-spadchina/010.jpg)
Фрагмент экспазіцыі