|
20 мая 2022 года Міністэрствам юстыцыі Рэспублікі Беларусь былі падведзены вынікі штогадовага прававога конкурса імя выбітнага юрыста, ураджэнца Беларусі Уладзіміра Данілавіча Спасовіча. Ва ўрачыстай абстаноўцы ў зале Дыпсэрвіс Хола (зав. Вайскавы, 4) адбылася афіцыйная цырымонія ўзнагароджання намінантаў мерапрыемства. Конкурс на прыз імя У.Д. Спасовіча праводзіцца ў мэтах павышэння прававой культуры грамадзян, ролі і значэння права, прапаганды станаўлення прававой дзяржаўнасці ў Беларусі, а таксама папулярызацыі прафесіі юрыста.
У цырымоніі падвядзення вынікаў і ўзнагароджання намінантаў конкурса прыняў удзел дырэктар Дзяржаўнай установы «Нацыянальны гістарычны архіў Беларусі» Алег Леанідавіч Воінаў.
Да згаданага мерапрыемства Нацыянальным гістарычным архівам Беларусі была падрыхтавана выстава, якая складалася з плакатнай экспазіцыі дакументаў пра паходжанне, сям’ю і раннія гады жыцця У.Д. Спасовіча, і вітрын, у якіх экспанаваліся чатыры арыгінальныя актавыя кнігі XVII стагоддзя з фондаў архіва. Вялікую ўвагу гасцей цырымоніі прыцягнулі арыгінальныя скураныя пераплёты кніг Браслаўскага земскага суда першай паловы XVII стагоддзя і старонкі кнігі Віцебскага земскага суда 1634—1636 гг. з выключна рэдкім прыкладам інкрустацыі тэкста золатам. Наведвальнікі выставы праявілі непаддзельны інтарэс да тэматыкі пісьмовай культуры XVI—XVIII стагоддзяў на землях Беларусі, а в.а. намесніка дырэктара архіва М.Д. Макараў адказаў на іх пытанні.
