Напярэдадні Дня народнага адзінства, які адзначаецца ў Рэспубліцы Беларусь 17 верасня, у НГА Беларусі 15 верасня 2023 г. адбыўся ўрачысты сход калектыву. У прывітальным слове дырэктар архіва Міхаіл Глушакоў падкрэсліў вялікае значэнне падзей 17 верасня 1939 года для мінуўшчыны, сучаснасці і будучыні Беларусі. Затым намеснік дырэктара Ірына Каўганава выступіла з паведамленнем, у якім распавяла пра складанае становішча Заходняй Беларусі падчас яе знаходжання ў 1921–1939 гадах пад уладай Польшчы, гістарычны кантэкст Вызваленчага паходу Чырвонай Арміі ў Заходнюю Беларусь у верасні 1939 года, асноўныя вяхі працэсу ўз’яднання Заходняй Беларусі з Беларускай Савецкай Сацыялістычнай Рэспублікай.

Пасля гэтага І. Каўганава прыняла ўдзел ва ўрачыстай лінейцы, прысвечанай Дню народнага адзінства, у дзяржаўнай установе адукацыі «Сярэдняя школа № 27 г. Мінска». Падчас свайго выступлення намеснік дырэктара архіва распавяла навучэнцам пра наяўныя ў Нацыянальным гістарычным архіве Беларусі матэрыялы, што раскрываюць абставіны знаходжання Заходняй Беларусі ў складзе Польшчы, і перадала школе копіі дакументаў з царкоўных метрычных кніг, якія адлюстроўваюць ажыццяўленне польскімі ўладамі палітыкі паланізацыі беларускага народу.

Супрацоўнікі НГА Беларусі, а таксама педагагічны калектыў і навучэнцы сярэдняй школы № 27 з вялікай цікавасцю праслухалі паведамленні, прысвечаныя Дню народнага адзінства.