22 мая 2024 г. на базе Нацыянальнага гістарычнага архіва Беларусі адбыліся заняткі па павышэнню кваліфікацыі работнікаў дзяржаўных архіўных устаноў у рамках адукацыйнай праграмы «Сучасныя падыходы да арганізацыі архіўнай справы ў Рэспубліцы Беларусь». Заняткі арганізаваны факультэтам павышэння кваліфікацыі і перападрыхтоўкі Інстытута дадатковай адукацыі БДУ.

Першы намеснік дырэктара Дэпартамента па архівах і справаводству Міністэрства юстыцыі Рэспублікі Беларусь Вольга Ледаўская і дырэктар Беларускага навукова-даследчага інстытута дакументазнаўства і архіўнай справы Андрэй Рыбакоў правялі для слухачоў круглы стол «Сучасныя тэндэнцыі ў справаводстве і архіўнай справе».

Акрамя гэтага, А.Рыбакоў правёў лекцыйныя заняткі, на якіх асвятліў асноўныя змены ў арганізацыі і вядзенні справаводства ў дзяржаўных органах.

Вядучы навуковы супрацоўнік аддзела выкарыстання дакументаў і інфармацыі Уладзімір Дзянісаў распавёў слухачам аб гісторыі архіўнай справы на беларускіх землях, гісторыі НГА Беларусі, складзе і асаблівасцях фондаў установы, найбольш значных дакументах, якія захоўваюцца ў архіве, а таксама аб асноўных напрамках яго дзейнасці. Для слухачоў была арганізавана экскурсія, падчас якой госці азнаёміліся са структурай навукова-даведачнага апарата, ажыццяўленнем сканавання архіўных дакументаў, а таксама з архівасховішчамі. Гасцям была прадастаўлена ўнікальная магчымасць аглядзець дакументы, узрост якіх наличвае стагоддзі. Зборы найстарэйшых дакументаў, якія ствараюць асаблівую атмасферу мінулых стагоддзяў, выклікалі сапраўднае захапленне.