20 студзеня 2025 г. у канферэнц-зале НГА Беларусі прайшоў сумесны сход працоўных калектываў Нацыянальнага гістарычнага архіва Беларусі і Беларускага навукова-даследчага інстытута дакументазнаўства і архіўнай справы, прысвечаны Адзінаму дню інфармавання насельніцтва на студзень 2025 года.

У ходзе першай часткі сходу разгледжана тэма «Удзел у выбарах – права і грамадзянскі абавязак кожнага» у рамках тэматыкі адзіных дзён інфармавання на 1 квартал 2025 года. Дырэктар НГА Беларусі Міхаіл Глушакоў і дырэктар БелНДІДАС Андрэй Рыбакоў распавялі пра важнасць удзелу ў выбарах. Намеснік дырэктара БелНДІДАС Сяргей Мішук выступіў з матэрыялам, які падрыхтаваны на аснове інфармацыі Акадэміі кіравання пры Прэзідэнце Рэспублікі Беларусь. У сваім выступленні С.Мішук растлумачыў правы і абавязкі выбаршчыкаў, асвятліў арганізацыю галасавання на ўчастках і па месцы жыхарства выбаршчыкаў.

У ходзе другой часткі сходу намеснік дырэктара НГА Беларусі Сяргей Рындзін азнаёміў аўдыторыю з дакументамі выставы, прысвечанай гісторыі выбарчай сістэмы на тэрыторыі Беларусі ў пачатку XX стагоддзя. На выставе прадстаўлены дакументы, якія асвятляюць правядзенне выбараў у Дзяржаўную Думу чатырох скліканняў і ва Усерасійскі Устаноўчы сход. Сярод адабраных дакументаў Маніфест імператара Мікалая II ад 6 жніўня 1905 г. аб заснаванні Дзяржаўнай Думы, ўзор «Ўрачыстага абяцання членаў Дзяржаўнай Думы» ад 6 жніўня 1905 г., спісы выбаршчыкаў у Дзяржаўную Думу, спісы кандыдатаў у дэпутаты Ўстаноўчага сходу.