2 жніўня 2024 г. Нацыянальны гістарычны архіў Беларусі сумесна з Нацыянальным архівам Рэспублікі Беларусь прыняў удзел у дакументальнай выставе «Дзяржаўны кантроль: па старонках гісторыі» ў рамках урачыстага мерапрыемства, прысвечанага 30-годдзю ўтварэння Камітэта дзяржаўнага кантролю Рэспублікі Беларусь. Мерапрыемства адбылося ў кангрэс-холе «Мінск» (вул. Кірава, 18).

НГА Беларусі прадставіў на выставе дакументы XIX - пачатку ХХ стст., якія адлюстроўваюць дзейнасць Мінскай і Віцебскай кантрольных палат на тэрыторыі Беларусі. Самы стары дакумент адносіцца да 5 студзеня 1866 г. Гэта часовае Палажэнне аб мясцовых кантрольных органах, зацверджанае імператарам Аляксандрам II. Сярод прадстаўленых дакументаў матэрыялы рэвізій фінансавай дзейнасці розных арганізацый у беларускіх губернях, пратаколы пасяджэнняў кантрольных палат, асабістыя справы служачых, тэкст прысягі («клятвеннага абяцання») інспектара Віцебскай Кантрольнай палаты Я.С. Вярышка (1897 г.) і матэрыялы аб скасаванні кантрольных палат у 1918 годзе і стварэнні савецкіх органаў дзяржаўнага кантролю.

Аб дакументах дарэвалюцыйнага перыяду гасцям мерапрыемства распавёў загадчык аддзела навукова-даследчай і публікацыйнай дзейнасці Сяргей Рындзін. Матэрыялы былі адабраны вядучым навуковым супрацоўнікам аддзела выкарыстання дакументаў і інфармацыі НГА Беларусі Уладзімірам Дзянісавым.