Правядзенне ў НГА Беларусі мерапрыемстваў, прымеркаваных да Дня бацькі

21 кастрычніка ў Рэспубліцы Беларусь адзначаецца Дзень бацькі. Мужчына, бацька - гэта падмурак сям'і, той, хто абароніць яе ад няшчасцяў і пазбаўленняў, хто заўсёды падтрымае і працягне руку дапамогі. Сёння ўмацаванне ролі бацькоўства з'яўляецца адной з найважнейшых задач дзяржаўнай сямейнай палітыкі. 21 кастрычніка на ўрачыстым сходзе калектыву дырэктар НГА Беларусі Міхаіл Глушакоў і намеснік дырэктара Наталія Булойчык павіншавалі мужчын - работнікаў архіва з Днём бацькі і пажадалі моцнага здароўя, доўгіх гадоў жыцця, сямейнага шчасця і дабрабыту. Перад сходам мужчынскай часткі калектыву былі ўручаны салодкія падарункі.

Да мерапрыемства падрыхтавана выстава дакументаў XVI - пачатку ХХ стст., якую прадставіў загадчык аддзела навукова-даследчай і публікацыйнай дзейнасці Сяргей Рындзін. Самым рарытэтным дакументам быў тастамент Урбана Станіслававіча Довкшы, у якім апекунам загадвалася даглядаць за яго сынам Іосіфам і накіраваць яго на навучанне ў школу. Дакумент датуецца 15 жніўня 1589 г. Сярод астатніх дакументаў прашэнні бацькоў з розных слаёў грамадства аб прыёме іх дзяцей у навучальныя ўстановы ў пачатку XX стагоддзя, а таксама лісты франтавікоў Першай сусветнай вайны – былых выхаванцаў Рагачоўскай настаўніцкай семінарыі. Лісты завяршаюцца гарачымі прывітаннямі родным і ў першую чаргу бацькам.