9 чэрвеня 2023 г. у Нацыянальным гістарычным архіве Беларусі прайшлі ўрачыстыя мерапрыемствы, прысвечаныя Міжнароднаму дню архіваў. У рамках іх першай часткі адбыўся сход працоўных калектываў НГА Беларусі і Беларускага навукова-даследчага інстытута дакументазнаўства і архіўнай справы, на якім прысутнічаў дырэктар Дэпартамента па архівах і справаводству Міністэрства юстыцыі Рэспублікі Беларусь Алег Воінаў. Дырэктар Дэпартамента павіншаваў архівістаў з іх прафесійным святам і ўручыў Падзякі Дэпартамента намеснікам дырэктара НГА Беларусі Ірыне Каўганавай і Максіму Макараву.

У рамках другой часткі ўрачыстых мерапрыемстваў намеснік дырэктара НГА Беларусі, кандыдат гістарычных навук Максім Макараў выступіў перад працоўным калектывам архіва з лекцыяй пра гісторыю стварэння і дзейнасці ў другой палове XIX – пачатку XX ст. папярэдніка НГА Беларусі, першага гістарычнага архіва на тэрыторыі нашай краіны – Віцебскага цэнтральнага архіва старажытных актавых кніг губерняў Віцебскай і Магілёўскай. Загадчык аддзела навукова-даследчай і публікацыйнай дзейнасці НГА Беларусі Дзмітрый Матвейчык падрыхтаваў да мерапрыемства выставу дакументаў, прысвечаных гісторыі Віцебскага цэнтральнага архіва, якая дэманстравалася падчас лекцыі і пасля яе заканчэння і выклікала значную зацікаўленасць прысутных.